Serokomarê Fransayê Emmanuel Macron piştî êrîşa îro Pêncşemê ya li bajarê Nice ku li gorî zanyariyên dawî 3 kes bi kêran hatine kuştin (jinek hatiye serjêkirin) û gelek kes jî birîndar bûne diçe cihê bûyerê.

Piştî êrîşa li ber kilîseya Notre Dame a li bajarê Niceyê li Parlamena Fransayê parlamenterên fransî ji bo qûrbaniyên êrîşê yek xulekê rêz girtin.

Herwiha Macron bi wezîrên hikûmeta Fransayê re li ser bûyerê civiya û maseya krîzê hat damezrandin.

Şaredarê bajarê Nice Christian Estrosi ragihand ku wê îro Macron derbasî bajêr bibe û li ser êrîşê lêkolînan bike.

Herwiha Estrosî li ser Twitterê daye xuyakirin ku kesê bi kêran êrîş kiriye hatiye desteserkirin.

Li dorûbera cihê bûyerê polîsê Fransî tedbîr standine û lêkolîn li ser tê kirin bê têkiliya vê êrîşê bi êrîşa serjêkirina mamosteyê zanîngehê Samuel Paty re heye yan na.