Navenda Nûçeyan- Li Çewlîga Bakurê Kurdistanê, li Navenda Fêrkirinê ya Gel ku ser bi Wezareta Perwerdehîyê ya Tirkîyê ve ye, kursek bo fêrkirina zaravayê Zazakî (Kirmanckî) tê vekirin.

Li gor daxuyanîya di malperê wê navendê de, kesên ku dixwazin beşdarî wan kursan bibin dikarin bi rêya online li ser malpera (http://bingolhem.gov.tr/) formê serîlêdanê tijî bikin.

Akademîsyen Murat Varol ku li zanîngeha Çewlîgê kar dike, derbarê vê mijarê de li ser hesaba xwe ya tora civakî bang li xelkê wî bajarî kir bo ku beşdarî kursê bibin û zimanê xwe fêr bibin.

Berî niha jî pirtûkên waneyên Zazakî ji pola 5-8 ku ji alîyê akademîsyenên Zanîngeha Çewlîgê û mamosteyên ser bi Perwerdehîya Bajêr ve hatibûn amadekirin, ji alîyê Wezareta Perwerdehîyê ya Tirkîyê ve hatibûn qebûlkirin.

Lêbelê ew pirtûkên bo Zazakî, ne li gor alfabeya Kurdî, li gor alfabeya Tirkî hatine amadekirin.