Qesra Elyseeyê îro şemiyê daxuyaniyek weşand û tê de diyar kir ku "Macron di pêwendiyeke telefonî li gel Erdoganî de nÎgeraniya xwe nîşan daye ji ber rewşa mirovî ya li Efrînê û jê daxwaz kiriye ku divê rê bidinê da ku alîkarî derbas bibe."

 

Herwiha di daxuyaniyê de hat gotin ku "Macronî ji Erdoganî re gotiye ku şerê li dijî DAIŞa terorîst tiştê herî giring e ji bo Fransayê" û xwestiy ku hemû aliyên li Sûriyeyê "zûka rêzê li biryara rawestandina şerî bigirin".

Hêjayî gotinê ye ku Serokkomariya Tirkiyeyê ragihandibû ku Erdoganî ji hevkarê xwe frensî re aciziya xwe anîbû zimên ji ber "wan îdîayên ne-rast ên li ser operasyona Efrînê."
Erdoganî gotibû ku "ti bingehê wan îdîayên li ser Efrînê tine ne."