Îdîa beno ke Wezaretîya Pawitişî ya Amerîka Pentagonî hukmatê Amerîka ra waşto wa 10 hezar eskeranê Amerîka bierşawê Rojhilatê Mîyanênî.

Vajîyeno ke Pentagonî Koşka Spî ra waşto wa 10 hezar eskeranê xo bierşawê Rojhilatê Mîyanên. Heto bîn ra ajansê Reutersê zî no derheq de nuşteyêk vila kerd û îdîa kerd ke, Amerîka do qasê 10 hezar eskeranê xo bierşawo Rojhilatê Mîyanên. 

Çend rojî verî zî îdîa bibi ke Amerîka do 120 hezar eskeranê xo bierşawo Rojhilatê Mîyanên la Serekê Amerîka Donald Trumpî na îdîa red kerdbi û vatbi pêro zur ê. La Trumpî vatbi eke luzum bikero ma eşkenê eskeranê xo bierşawe Rojhilatê Mîyanîn. 

Seke zanîyeno mabênê Amerîka û Îran de krîzê sîyasî û eskerî esto û beno ke nê her di welatî şer bikê. Aye ra qismêk îdarekarê Amerîka qayîlê wa Amerîka bido Îran ro û şer dest pêbiko.