• Diyarbakır 15 °C
  • Batman 13 °C
  • Hakkari 8 °C
  • Şırnak 9 °C
  • Ağrı 6 °C

Hûmarê 50. yê Kovara Vateyî Pîroz Bo!

Hûmarê 50. yê Kovara Vateyî Pîroz Bo!
Xebatê Grûba Xebate ya Vateyî û vetişî kovara Vateyî xebatêka îdeal, bêteref û kollektîf a.

Mehmed Selîm Uzun

 

Hûmarê 50in yê kovara Vateyî newe kewt mi dest.

Grûba Xebate ya Vateyî 21 serrî ra ver dest xebatê xo kerd. Ney ra 20 serrî ra ver zî kovara Vateyî dest weşênayîşî xo kerd. Grûba Xebate ya Vateyî heta ewro 28 kombîyayîşî viraştî û 50 hûmarî kovarê Vateyî vetî. Bê înan kirdkî ferhengî, rêberî rastnuştişî û zaf cure kitabî çap kerdî.

Bêguman, na yew gama muhîm a, tarîxî ziwanî kurdkî de û taybetî tarîxî kirdkî (kirmanckî, zazakî, dimilkî) de yew averşîyayîşo muhîm o. No, semedê kirdkî yew prosesî xoverdayîşî yo, çinêyebîyayîş ra verbî prosesî newerazîyayîş û xoîsbatkerdişî yo. Zîra heta yew ziwan de qisêkerdiş, nuştiş û wendiş bibo, o ziwan esto û cuwîyeno.

Nê 21 serran mîyan de no proses çetin la pê fedakarey, sebir, xebatêka kollektîf û îstîqrarin vîyert!

Zaf eşkera yo ke prosesî standardîzasyonî kirdkî pê Grûba Xebate ya Vateyî û pê kovarê Vateyî dest pêkerdo û no proses ewro zî dewam keno. Heta ke no proses dewam bikero rol û muhîmîyê kovarê Vateyî nêbedilîyenî, dewam kenî

Ewro, Vate, wayîrî yew mîsyonî tarîxî yo û bîyo sey yew mektebî. Vate, prosesî standardîzasyonî kirdkî de êdî referens û rêber o. Zaf merdimanê ke Vate de pê şîîr, sanike, hîkaye, fiqra ûsn. dest pêkerdo, ewro beranî (ürün) erjîyeyan danî û bîy wayîrî eseran. Rayîro ke Vateyî akerdo şax dayo, reya û rîçikî verdayî, binge girewto. Nê rayîr û bingeyî ser o welat de zaf cayan de kovar û rojnameyî neweyî vejîyenî, kûrsî ziwanî abenî, televîzyonî weşan kenî, dezgeh û sazgehê kulturî û komelkî virazênî.

Xebatê Grûba Xebate ya Vateyî û vetişî kovara Vateyî xebatêka îdeal, bêteref û kollektîf a. Şarî ma û herkerdoxanî ziwanî ma yê şîrînî her daîm maddî û manewî destek û ardim dayo na xebata erjîyaye.

Keyeyî înan awan bo!

Ma ancax pê şarî xo û pê destekî dost û embazanî na xebat estî! Ez hêvî ken ardim û paştdayîşî şarî ma û destekî nê dost û embazanê ma yê erjîyayan ewro ra pey zî do dewam bikero!

Hûmarê 50. yê kovara Vateyî pîroz bo!

23.01. 2017

 

 

Ev nûçe 741 caran hatiye xwendin
BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin
LI VÊ NÛÇEYÊ HÎN ŞÎROVE BARNEBÛNE.
Nûçeyên din