Serkomarê Tirkiyê Recep Tayîb Erdogan hişyarî da welatên rojava û ragihand, eger ew “ji dil” piştevaniya Tirkiyê bikin dê li Sûriyê dîsa aşitî û aramî pêk were.

Serkomarê Tirkiyê Receb Tayîb Erdogan bi helkefta dehemîn salvegera şerê Sûriyê, ji malpera Amerîkî ya Bloomberg re nivîsek nivîsî.

Erdogan di nivîsa xwe de dibêje, siyaset û helwesta Tirkiyê li Sûriyê, ji destpêkê de heta niha, nehatiye guhertin.

Erdogan her wiha dibêje, eger yekparçetiya xaka Sûriyê û yekitiya wê ya siyasî neyê dîtin û pesendkirin, pirsgirêka Sûriyê dê bi rengekî mayînde neyê çareserkirin.

Serkomarê Tirkiyê bang li welatên rojava jî kiriye û ragihandiye, eger welatên rojava “ji dil” piştevaniya Tirkiyê bikin dê aşitî û aramî dîsa li Sûriyê pêk were.

Erdogan berê xwe daye rêveberiya nû ya Amerîka bi serokatiya Joe Biden jî û gotiye, divê rêveberiya Biden, sozên ku dane Tirkiyê, bicîh bîne û ji bo rizgarkirina Sûriyê ji aloziyê bi Tirkiyê re kar bike.

Serkomarê Tirkiyê li ser dagîrkirina beşek ji xaka Rojavayê Kurdistanê jî gotiye, ew der “herêmên ewle ne û nîşana wê yekê ne ku Tirkiye girîngiyê dide yekparçebûna xaka Sûriyê!”

Erdogan behsa kurdan û YPGê jî kiriye û gotiye, divê welatên rojava û Amerîka dest ji piştevanîkirina YPGê berdin û bi Tirkiyê re kar bikin.