Merkezê Xeberan- Erdlerzê Xarpêtî de 20 ra zafêr kesî merdî. Yeno vatiş ke, hûmara merdeyan do hîna zaf bo. Ame vatiş ke, 1000 ra zafêr kesî  birîndar bîyî.

Wezîrê Weşî yê Tirkîya Fahretîn Koca va, binê enkazî de hema merdimî estî û beno ke hûmara merdeyan zafêr bo.
Qezaya Madenî ya Xarpêtî de zî di kesî bînî binê enkazî ra ameyî vetiş. Dewa Gezîn de 12 saete badê erdlerzî cînîyêka digane binê enkazî ra amey xelisnayene. Taxa Mustafa Paşa dî zî di kesî amê xelisnayene.

Goreyê AFADî merkezê Xarpêtî de 4 bînayî rijîyayî, 21 kesî merdî û 1030 kesî birîndarê. Ame vatene ke rasteyê teyara şuxulyeno. Şebekeyê xeberdayîşî  wextêko kilm birya nika problem çîn o. Problemê elekrîk û dogalgazî çareser bi. Trenê herême ancîyayî îstasyonanê nêzdîyan.

Heto bîn ra şarê bajarî ra ame waştenê ke wa bi wesayîtanê xo yê şexsîyan mevejîyê trafîkî.