Enwer Yilmaz

Ez wazena no hewte çîyê ke warê sîyasetî û bîyayîşanê peyînî ke vejyayê ver, înan ser o çend çîyan vajî.

Eke wextê mi bibo ez do her hewte bîyayîşanê peyênan ser o fikranê xo vajî, çîyanê muhîmanê ke ma kurdan eleqedar kenê ser o vinderî.

Vatişê Serekwezîrê Îtalya yê derheqê Erdoganî de

Serekwezîrê Îtalya vera dewleta Tirkîya razînêbîyayîşê xo mojna û îfade kerd ke gere Erdogan sey dîktatorî bêro dîyayîş.

Çend rojî verî Sereka Komîsyonê Yewîya Ewropa Ulsula von der Leyen û Serekê Komîsyonê Yewîya Ewropa Charles Michelî Anqara zîyaret kerdbi û Erdoganî reyde roniştbî. Pêvînayîş de Erdogan û Michel serê kursî de roniştî la Leyen payan ser o mende û dima ra zî seke biheridîyo  kanepe ser o ronişte.

A fotografe pêro dinya de raştê xeylê razînêbîyayîşan û rexneyanê tûjan amey û sey 'skandalê kanepe' nusîya.

Serekwezîrê Îtalya Mario Draghiyî konferansêkê çapemenîye de qisey kerd û va ke “ Sereka Komîsyonê Yewîya Ewropa Ulsula von der Leyen rê heqaretêko pîl ameyo kerdiş. Bewlî bîyo ke Erdogan dîktator o. Ez pê nêzdîbîyayîşê nê dîktatorî zaf xemgîn bîya.''

Nê vateyanê Serekwezîrê Îtalya ra dima Erdoganî vengê xo nêkerd. Ortaxê ey Baxçelî zî vengê xo nêkerd. (Baxçelî her tim ey ra ver kardîya ey anceno û cewab dano êyê ke fek erzenê ey)

Xora zanîyeno ke Ewropa de zaf Dewletî esasêxo de sey dîktator ewnîyenî Erdoganî ra. La semedo ke çend menfiatê înan estê dewleta Tirkîya îdare kenî.

Erdogan bê destegdaranê xo welatê xo de zî sey dîktator yeno vînayîş. Erdoganî welato ke îdare keno de heqanê miletê Kurd, kêmnetewanê bînan, dîn û mehzeban nêdano, înan rê zulum keno û bê destegdaranê xo hetê ekonomî ra milet perîşan kerdo, milet zafê xo mîyanê feqîrî de cuyeno.

Nê kerdênê Erdoganî hetê hevalanê ey ê verînan ra zî sey ‘dîktatorî’ yenê vînayîş. Mîyanê Partîya ey AKP ra 2 partîyê bînî vejyay û nika vera Erdoganî sîyasetê xo kenê. Erdogan û bi waştişê Baxçelî keno ke pêrûna partîyanê kurdan zî biqefilno. Belkî bişeko belkî nêeşko… La aşkereyo ke kelîme û îthamê ‘Diktarotorî’ do her tim dusyayê Erdoganî bê.

Kerdêna Qeyûman

Qeyûmê Şaredarîya Farqînî yê Amedî herinda tabelaya bi hîrê ziwanan (kurdkî, tirkî, îngilîzkî) de têna tabelaya tirkî rona.

Bêtehamulîya qeyûman a vera kurdkî dewam kena. Reya verêne 2016 de qeyûmê Farqînî yê ê çaxî  tabelaya bi hîrê ziwanan (kurdkî, tirkî, îngilîzkî) de têna tabelaya tirkî ronabî.  Xebera tabela hesabê twitterî yê Qeymeqamîya Farqînî de weşanîya.

Ez vajî ke nê kerdênê qeyûman bi zîxnîyetê Dewlet Baxçelî benê û zaf AKPyijî zî no muaeleyo ke ziwanê Kurdan rê beno vera aciz ê.

Êyê ke şaredarîyan îdare kenê ganî ziwanan û mehzeban rê dişmenetî nêkerê. Hadî ma vaje, dezgeyê dewlete kenê dişmenetî. La qey beledîyeyî kenî!! Zemanêk beledîye ra yewêk mi ra vatbi: Qayûmî pêro dişmenê miletê kurd ê û ulkucî yê.

Lînçkerdişê Ersîn Korkutî ser o

Kaykerdoxê Tîyatroyî Ersîn Korkut yew qiseykerdişê xo de va: Ez Amedî ra hes kena. Amed paytaxtê ma wo.

Nê vateyanê ey ser ra kanal û keyepelê ke nêzdîyê hukmatî bî pêro yew hewe ra hêrişê Ersînî kerdî û ser medyaya sosyale ra kampanyaya lînçî dîya dest pêkerdiş.

Feqîro Ersîn Korkut tersa xo vera yewna beyanat da û va: Ez xelet ameya fehmkerdiş. Qestê mi paytaxtê kulturî bi. Mi kamî ke kerdo xemgîn ez ozrê xo wazena.

Ez wazena Ersînî ra vajî: Werrekna cesaretê Ahmet Kaya, Yilmaz Guney, Şiwan Perwerî to de zî bibîyêne. Semedo ke ti nêwazenî îşê xo ra bibî ti ozrê xo wazenî. La merdimê cesurî ma het û şarê ma yê welatperwerî het de qîmetin ê bizane. Merdimê sey to ney.

Tabî ma lînço ke nameyê to ser o beno şermezar kenî û kişta to de ca gênê. Ma xeberê to day û wayîrê to vejyay. La to sekerd! To ozrê xo waşt. Û çimanê ma de zaf kewtî bizane.

Hetanî hewtêna bimanêne xeyr û weşîye mîyan de.