• Diyarbakır 6 °C
  • Batman 5 °C
  • Hakkari 4 °C
  • Şırnak 8 °C
  • Ağrı 0 °C

Encamnameya Konferansa: Em Êzîdî ne

Encamnameya Konferansa: Em Êzîdî ne
Li bajarê alman Pldenburgê bi navê EM ÊZDÎ NE konferansek pêk hat.

Li bajarê Almanyayê, Oldenburgê Konferanseke bi navê EM ÊZDÎ NE pêk hat. Konferansa ji aliyê Navenda PENa KURD, Navenda Şêwêrmendiya Êzidiyan li Almanyayê û Navenda Mala Êzidiyan li Oldenbûrgê  hatibû organîzekirin di 20.08.2016an de, pêk hat.Gelek rewşenbîrên kurd û nûnerên sazî û civaka Êzdiyên li Almanyayê beşdarî Konferansê bûn û di dawiya Konferansê de encamnameyek hat belavkirin.

Encamnameya Konferansê ev e:

Ev konfêrans bi dirûşma " EM ÊZIDÎ NE" bersivek wêjeyî ya rewşenbîrê kurd e, ji bo qirkirina li ser Êzdixanê li Şengalê ȗ herweha civaka Ȇzdiyan di duhemîn salvegera vê komkujiyê de, di 20ê Tebaxa 2016ê de li bajarê Oldenburgê hat lidar xistin.

 

Kiryarên ku hêzên terorîstên tarî û mirovkuj yên bi navê “Dewleta Islamî” (DAISH) ê li dijî mirov û çanda me yî Êzidîtiyê li Şingalê kirin, Fermana qirkirina me Êzidîyan û çanda me yî kurdî bû, ku li gor pîvanên şarezayên Yekîtiya Neteweyan jî gihiştiye asta Komkujiyê (Genozidê).

 

Armanca me ew e, ku em bala tevayiya rewşenbîrên Kurd û cîhanê, dezgehên netewî û navnetewî yên tevayiya gelê Kurd, raya giştî ya cihanê, Yekitiya Netewan û Yekitiya Ewrûpayê bikşînin ser pirsgirêkên vê qirkirinê û rêçareyan bi lezgînî û bi wicdan ligor pîvanên navnetewî yên mirovahiyê û li gorî hiş û hestên Êzidiyan bibînîn.

 

Civaka Êzidiyan di encama zilm u zoriyeke dijwar û pêvajoya dîrokeke giran de, niha di demeke pir girîng û hestyar de dijî. Di sedsala dawîn de, bi sedema gelek egeran, Ȇzîdî mecbȗr mane welatê xwe, şênê pîr-kalan û dê-bavan, milk û mal, perezgehên xwe yî pîroz û goristanên xwe bi cî bihêlin ȗ li temamiya cihanê bela bibin. Lewre jî bi asîmlasiyonê, pirsgirêkên hebȗn-nebȗnê ȗ nexweşiyan re rû bi rû mane. 

 

Kareseta Şengalê, ya ku qirkirina Êzidiyan ji xwe re kiribû armanc, di 3ê Tebaxa 2014an de Ȇzdî hanîn û wan li ber hebûn û nebȗnê dane sekinandin. Di welatê me  yî dêrîn û kevnar de, li ser axa pîr-kalan û dê û bavan, tenê gavek erd di bin piyên me de mabȗ, ew jî kete tirsa nemanê.

 

Çeteyên mirovkujên “Dewleta Islam” î, DAȊŞê, bi çekên giranên herî pêşketî ȗ bi piştgîriya gelek dewlet û rêxistinên îslamî Şengal talan kirin. Ew warê ji bo êzidiyan pîroz, dil ȗ sembola Ȇzdîxanê, ciyê  parastina bawerî, çand û dîrokê, di nava çend sehetan de tar û mar û wêran kirin.

Pêtir ji 430 hezar Êzdî di welatê xwe de bûne aware û penaber. Bi hezaran jin, keç û zaroyên Êzidiyan dîl hatin girtin û wek kole li bazarên dewletên îslamî îro jî têne firotin. Bi hezaran kal, pîr, jin û mêr bi hovitî hatin qetilkirin.

Konferansa me Bang li hemû rewşenbîr û nivîskarên Kurd û yên cîhanê, Yekitiya Netewan û Yekitiya Ewrûpayê dike, ku ew bi awayeke xurt parêzerên daxwazên li jêr bin û jibo bicîhanîna wan çalak bixebitin.

Mafê rewa yê Êzdiyan jî, çi yekane, çi komane heye, ku di nav aşitî, aramî û azadiyê de li ser axa pêşîyên xwe bijîn. Xwedî li bawerî, ol, çand, ziman û dîroka xwe derkevin, biparêzin û pêşve bibin.

Jiber wê jî divê;

1- Êzdixan di nav nexşeya Kurdistanê de be, lewra dilê dîrok û çanda Kurd û Kurdistanê ye,

2- Xelkê Êzdixanê, ango Êzidî di nav Erdnîgariya Kurdistanê de xwediyên mafên xwe yên çarenûsiyê, xweîdarekirinê, birêvebirina dezgehên xwe yî ewlekarî û parastinê bin,

3- Bajar û Gundên Êzdixanê û rêyên wê bi zûtirîn dem ji nû ve bêne avakirin, hemû xizmet bên pêşkeş kirin, daku şêniyên wê yên aware û penaber vegerin warê xwe û li kelepora xwe xwedî derkevin û civaka xwe pêşve bibin,

4- Bi lezgînî li Êzdixanê, Zanîngeh û navendên Akademî, nexweşxane û dezgehên derûnî, xwendegeh û dezgehên perwerdeyî bêne zêdekirin û nûjenkirin, û hemû dezgehên xizmet gihandinê û jêrxana abûrî werine vekirin.Herwaha ji mîrî, ango hikûmeta başurê Kurdistanê tê xwestin, ku ew li her zanîngeheke başûrê Kurdistanê beşê lêkolînên êzdayetiyê veke û bi bawerî piştevaniya wan bike, peywendiyên xwe bi dewletên derve  re bike merc, da beşên zanyariya Kurdologiyê – û di nav de beşê zanyariya êzdatiyê-  vekin, bê çawa wan, beşên Tirkologiyê, Arabistik, Semîtistik û beşê zanyariya Islamê vekirine.

 

5- Plan û programek ji bo pêşxistina jiyana ekonomik a Êzdixanê bi xelkê Êzdîxanê re bête amadekirin,

6- Komkujiya Şengalê mîna Jenosid li Hemû dewlet û dezgehên navnetewî  bê qebûlkirin,

7- Li dewletên Êzidî lê dijîn, ola Êzidîtiyê fermî di yasayên wan ên bingehîn de û di dezgehên navnetewî de, mîna Yekitiya Netewan, Yekitiya Ewrûpa û hwd. bête parastin û garantî kirin. 

8- Konferans ji hemû partî, hêz û rêkxistinên Kurdistanî, yên di berxwedana Şengalê de beşdarin, hêvî dike, ku ew qedera civaka Êzîdî bikin bingeha yekitiya netewî û pêşerojek azad û bihevrejîyanê bibin alîkar. Herwaha ew berxwedana hemû şervanên Kurdistanê; Gerîlla, Pêşmerge, û Şervanên din ji bo parastina Şengala Pîroz bilind dinirxîne û silavan li şehîdên berxwadana Şengalê dike.

Bi navê Konfêransa  EM ÊZİDÎ NE

 

Navenda PENa KURD

Navenda  Mala Êzîdiyan li Oldenbûrgê

Navenda Şêwêrmendiya Êzidiyan li Almanya 

 

Oldenburg, 20.08.2016

Ev nûçe 971 caran hatiye xwendin
BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin
LI VÊ NÛÇEYÊ HÎN ŞÎROVE BARNEBÛNE.
Nûçeyên din