Dewa Axzunigî ya qezaya Xozatî ya Dêrsimî de Sakîne Konak û Kiymete Konak lojman û dibistan de manenê. Cinîyan pare kerd ke rewşa înan a ekonomîke xirab a û waşt ke înan rê hetkarîye bêra kerdene.

Dewa Axzunigî ya qezaya Xozatî ya Dêrsimî de Sakîne Konak û Kiymete Konak lojman û dibistan de manenê. Sakîne Konak pa çar domananê xo lojmanê vengî yê dibistanî de, Kiymete Konak zî pa mêrdeyê xo sinifêka dibistanî de manena. Wird cinîyî zî pê heywankarîye debarê xo kenê û hetê qeymeqamîye ra dibistan û lojman de ameyî cakerdene.

Sakîne Konak pare kerd ke ê odaya yewçime de nêeşkenê xo bileqnê û vat: ''Ez tîya ra ya. Ma keyeyê merdimanê xo de ciwîyayêne. Emser ê Îstanbulî ra ageyrayî ma zî neçarî ra keyeyî ra vejîyayî. Ma zaf zehmetî antî. Netîceya muracatê ma de qeymeqamîye ma tîya de ca kerdî. Eke siba nê vajê 'vejîyê' ma do şorê kamca? Rewşa ma ya madî xirab a. Ma nêeşkenê 4 kesî tîya de biciwîyê. Wa selahîyetdarî ma rê ardim bikerê. Ma wazenê keyeyêkê ma bibo ke ma sereyê xo bifînê ci.''

Kiymete Konak zî da zanayene ke ê 2006 de zehmetîya madî ra agêrayî dewa xo û nika zî 2 kesî uca de manenê. Kiymete vat: ''Keyeyê ma çin o, rewşa ma ya madî xirab a. Wextê weçînayîşî de wezîrî yenê ma ra paştdayîş wazenê, soz danê ma. La sozê xo nêanê ci. Banyo û lawabo teber de yê. Kam bêro ma heman oda de manenê. Hukmat mi rê vano 'meşnayê to estê, to rê bes ê.' Ez pê meşnayan se bikera. Mêrdeyê mi nêweşê qelbî yo, ez zî nêweşa astimî ya. Ne selahîyetdarî ardimê ma kenê ne zî çew sozê xo ano ca.''