Endamê keyeyê Şenyaşaro ke merdimê ci hetê Îbrahîm Halîl Yildizê AKPyîjî ra Pirsûs de kişîyayî, verê edlîye de çalakîye kenê. Keyeyî venga her kesî da ke wayîrê dewa vejîyo.

Qezaya Pirsûsî ya Riha de wextê weçînayîşanê 2018î de 24ê hezîrane de pawitoxanê Wekîlê AKPyî Îbrahîm Halîl Yildizî û merdimanê ci hêrişê keyeyê Şenyaşarî kerd. Hêriş de ke nêweşxane de zî dewam kerd mêrde û lajê Emîne Şenyaşar kişîyayî. Emîne Şenyaşar û lajê ci Ferît Şenyaşarî pê waştişê edaletî verê edlîyeyê Riha de çalakîya roniştişî daye destpêkerdene. Waştişê pêvînayîşî yê dosyaya dewaya Şenyaşarî hetê serdozgerîye ra nêame qebulkerdene.

Ferîy Şenyaşarî vat endamê keyeyê înan nêweşxaneyê Pirsûsî de bi barbarî kişîyayî la sûcdarêk zî nêame tepiştene. Ferîtî ard ziwan ke înan waşt serdozger bivînê la waştişê înan ame redkerdene. Ferîtî vat: ''Verê çimanê dadîya mi de babîyê mi kişîya. Walîyê Riha zî şahîdê ney o. Walî vano wextê ci bêro her çi eşkera beno. Hînî ma de sebr nêmend. Heta ke sûcdar û kiştoxî nêrê tepiştene ma tîya de yê.Ma venga her kesî danê ke wayîrê dewaya ma vejîyo.''

Dayîke Emîne vat: ''Nêweşxane de domanê mi kişîyayî. Ma şîyî verê dozgerî la ey nêwaşt ma bîvîno. Keyeyê mi kişîya lajêkê mi zî tepişîya. Her çi eşkera yo. Heta lajê mi vera nêdîya ez tîya de ronişena.''