Wezîrê Derve yê Amerîkayê dibêje, ew kar dikin ku Îranê ji Neteweyên Yekbûyî û rêxistinên navdewletî yên mafên jinan derbixin. Wî bang li Îranê kir ku "tavilê zextên xwe" yên li dijî xwepêşanderan rawestîne.

Wezîrê Derve yê Amerîkayê Anthony Blinken îro Pêncşemê di daxuyaniyekê de got, “Hikûmeta Îranê bi zext û zordariyê bersivê dide xwepêşanderan û cezaya bidarvekirinê li xwepêşanderên aştiyane dibire.”

Blinken di daxûyaniyekê de amaje bi Encûmena Bilind a Mafên Mirovan a Neteweyên Yekbûyî (UNHCR) kir ku îro li Cenevê di civîna xwe de behsa “xirabbûna rewşa mafên mirovan li Îranê” kir û bal kişand ser reftara rayedarên Îranê bi xwepêşanderan û “zext û tundiya li dijî keç û jinan”.

Wezîrê Derve yê Amerîkayê dibêje, Îran cezaya bidarvekirinê dide xwepêşanderên aştiyane û bang li Îranê jî dike ku tavilê dawî li vê “tepisandinê bîne û tundiya li ser keç û jinan rawestîne.”

Blinken diyar kir ku Encûmena Bilind a Mafên Mirovan a Neteweyên Yekbûyî (UNHCR) dê bala civaka navneteweyî bikşîne ser krîza mafên mirovan li Îranê, lêkolînê li ser wê bike û mekanîzmayeke berpirsiyariyê ji bo destnîşankirin û belgekirina kesên ku di tepeserkirina xwepêşanderan de cih digirin, saz bike.

Blinken her wiha anî ziman, “Girîng e civaka navneteweyî bi hev re bixebite da ku piştrast bike rola Îranê di Neteweyên Yekbûyî û rêxistinên din ên navneteweyî yên din ên ku di parastina mafên mirovan bi taybetî jinan de cih digirin, tunebe.”

Civîna roja Pêncşemê ya Encûmena Bilind a Mafên Mirovan a Neteweyên Yekbûyî li ser daxwaza Almanyayê hat lidarxistin ku ji aliyê zêdetirî 50 welatan ve hat piştgirîkirin û daxwaza lêkolîneke serbixwe û navdewletî derbarê binpêkirinên Tehranê hate kirin.