Weşanxaneyê Nûbiharî ra bi kirdkî kîtabêko newe vejîya. Bi Mesel û Mîsalan Destanê Memê Alan. Kitab hetê nuştox Umer Farûq Ersozî ra nusîyayo. Eser manzum yew eser o û 14 hece ser o awan bîyo. Her beş 21 beyît o.

Umer Farûq Ersoz kam o:

Umer Faruq Ersoz, serra 1977 de dewa Çewlîgî Çilkanî de dadîya xo ra bîyo. Keyeyê înan esas dewa Gowdereyî Zuvêrî Kebîr ra yê. Mektebo verên Çilkanî de, mîyanîn Îmam Xetîp de, lîse zî Lîseya Weşîye de wendo. Mektebo berz de tehsîlê huqûqî dîyo.

Cuya memuratî ci rê teng ameya coka îstîfa kerdo. Dima şîyo Almanya. Uca zewecîyayo. Badê cû serra 2005î de agêrayo Çewlîg. Çewlîg de dest bi avûkatî kerdo. Semedê sebebanê sîyasîyan kewto hepis. Hewt serrî pey beran de mendo.

Nika ridê qedexebîyayîş ra nêeşkeno avûkatî bikero. Wexto ke hepisxane de bîyo, xeylêk kitabê kirdkî nuştî. Ey waşto ke ziwan û kulturê babî û kalikanê xo ser o bixebitîyo û bi kirdkî eseran bido ke qet nêbo bieşko deynê şarê xo û Heqî biney sivik bikero. Bi nameyê Esma û Veranas di keynayê ey estê. Heta nika hîrê hebî kîtabê ey weşanîyayê: Kekû, Berenge û Vervate

Nimûne:

BINÊ KURKÊ MEMÎ DE XONIMITIŞÊ ZÎNÊ

Halhala ke zêdîya Mem û Zîne bi dejan

Şerme ver a xo eşto koşkê Zîne sey gejan

Zînê waşto ke erd bişeqyo tira şêro war

Nêzanên çi bikiro verdîya, bî huşkê dar

Heverî rap rapîyê lingan dîyêbî goş a

Virisnê ke bîy nizdî bi yew tersê argoş a
Xo eşto binê kurkê Memî û xo nimito

Û kewto qelaqûto bin a nêkerdo wito

Vengê mîr Êzînî û Bekê Ewanî zima

Mat û maleq a amey hîrê heme çim çim a

Şarmeyê xo ver a Mem sey şiktayê yew elbik

Areq piro amên war mendibi îna çalpik

Darbê lingê xo kerdbi me’na nêşibi tede

Lingê xo xo zêderi key deybî sey yew gede

Bê rizayê mîr Êzîn kewtibi cayo mahrem
Çewî vatînên derey bin a nêbi namahrem

Mîr Êzînî bi hers a ame ver de edilya

Mûrê xo ardo pêser reng eşt û o bedilya

Mem ver a nêwarişt pay bi dûdil a dîya tew

La qet bin a anêkerdo Memê Alanî lew

Senî ke yew mîlçike tersê helîyan ver a

Xo erzena teliyêk bi can û bi cîger a

Zîn zî xo dabi binê wina bêxem roniştiş

Rîsîyayê denên ci bi hurmet a wariştiş

Çime: Kirdki.com