Wezîrê Teberî yê Îranî Cevad Zarîf vano “Wa Serekê Amerîka Donald Trump ma tehdîd nêkero, herinda tehdîdî de gere hurmet nîşanê dewleta Îranî bido.”

Zarîfî va “ Trump bi  şîretkerdoxê xo John Bolton û Serekwezîrê Îsraîlî Benjamin Netanyahu her roj ma tehdîd keno. Dewleta Îranî hezaran serrîyo ke xo lingan ser o ya. Terorîzmê ekenomî û tehdîdê dewletanê bînan nêeşkenê zirar bidê Îran. Fermandarê Nobedarê Şorişê Îranî Huseyîn Selamî zî vano: Welatê ma şer nêwazeno la ma şerkerdiş ra zî nêtersenê.
Îdarekerê Washington û Tehranî her çiqas zî vanê, Ma şer nêwazenê zî, mabênê her di welatan de krîzê sîyasî, ekonomî û eskerî roje bi roje giran beno.

Senatorê Amerî Lindsay Graham zî vano: Ma ra zîyade dewleta Îranî her roj hem ma hem cîrananê xo tehdîd kena. Gere ma cewabêko eskerî bide dewleta Îranî. Ez her tewir desteg dana Serekê Amerîka Donald Trumpî.