Merkezê Xeberan - Polîsanê Amerîka Minneapolis de verê çimanê hemwelatîyan de camêrdêko afro-amerîkan George Floyd (46) qetil kerdbi. Hedîse ra dima zî protestoyî dest pêkerdî û vizêr heta şan zî protestoyî dewam kerdî.

Mudirê asayîşî yê şaristanê Minneapolisî yê Amerîka seba aramîye venga şarî da. Çalakîkeran dormeleyê qereqola polîsan ê kiştoxan de marketêk û dikanêk vêşna. Polîsan vera çalakîkeran bombaya gazî xebitna û pê bendan nêverda ke çalakîkeran xo biresnê qerqole.

Keyeyê George Floydî waşt ke polîsê ke bîyê sebebê Floydî, wa sûcê cînayetî ra bêrê hukmkerdene. Way Bridgette Floyd kanalê xeberan NCByî rê qisey kerd û va: ''Çunke oyo ke înan kerd cînayet o, înan birayê mi kişt. Ez pê bawer a ke edalet do bêro ca.' Wezîfe ra dûrvistiş qîm nêkeno”.

Polîsê kiştoxî serbest ê

Çar polîsê ke tewrê serebûtî bîyî, roja sêşemeyî wezîfe ra ameybî dûrîvistene la ameyî veradayîş. Derheqê înan de tehqîqatê dîya destpêkerdene.

Şaredarê Minneapolisî Jacob Freyî persa ke çira kiştoxê Geroge Floydî nênê tepiştene û va: ''Eke ma çîyêko winasî bikerdêne ma nika zîndan de bîyêne.''

Serekê Amerîka Donald Trumpî twitter ser ra beyanatêk da û polîsanê federalan ê FBI û Wezaretê Edaletî ra waşt wa na hedîseya trajîke û xemgîne eşkera bikerê.