GÎYAVî Amed, Çewlîg, Riha, Mûş, Dêrsim û Erzîngan de kirdkî ser o cigêrayîş kerd. Goreyê netîceyanê cigêrayîşî domanan ra se ra 7î û pîlan ra zî se ra 8î bi kirdkî qisey kenê.

Weqfa Hetkarîya Merdimîye û Koçî (GÎYAV) Amed, Çewlîg, Riha, Mûş, Dêrsim û Erzîngan de kirdkî ser o cigêrayîş kerd û netîceyê nê cigêrayîşî sey raporêkî weşana.

Rapor de ame parekerdene ke kirdkî hînî keye, kuçe, mîyanê komelî de mîyanê neslanê neweyan de tay şuxilîyena.

Cigêrayîş de nê çîyî ameyî tesbîtkerdene;

-6 şaristanan de domanan ra se ra 7î û pîlan ra zî se ra 8î bi kirdkî qisey kenê.

-Domanan ra se ra 7,9ê ci 'eşkenê bi kirdkî qisey bikerê, fam bikerê û binusê', pîlan ra zî se ra 8,7ê ci 'eşkenê bi kirdkî qisey bikerê, fam bikerê û binusê.'

-Domanê ke eşkenê bi kirdkî qisey bikerê nînan ra se ra 67,2yê ci ziwan keyeyê xo ra, se ra 32,8ê ci zî ziwan cîran û embazanê xo ra musayî.

-Domanê ke tewrê cigêrayîşî bîyî nînan ra se ra 86,7ê ci vat ke ê wazenê kirdlî bimusê û qisey bikerê, se ra 67,2ê ci wazenê şorê kursê kirdkî. Pîlan ra zî se ra 64,1ê ci seba ke ziwanê xo bimusnê domananê xo xîret kenê.

-Kirdkî zereyê keyeyî de se ra 56,1 şuxilîyena. Se ra 46,6ê domanî keye de dadî û babîyanê xo de bi kirdkî qisey kenê. Pîlan ra zî se ra 62,5î domananê xo de bi kirdkî qisey kenê.

-Domanan ra se ra 58,8ê ci kuçeyan de bi kirdkî qisey kenê. Pîlan ra zî se ra 78,8ê ci kuçeyan de bi kirdkî qisey kenê.