Merkezê Xeberan- HDP bi beşdariya 7 partî û firaksiyonê Kurd ê Bakurê Kurdistanî “Komxebata Yewîtîya Neteweyî” virazena.

Partiya Azadiya Kurdistanî (PAK), Partiya Sosyalîst a Kurdistanî (PSK) û Partiya Heq û Azadiyan (HAKPAR), Partiya Kurdistanî (PAKURD) û Hereketa Azadî  beşdarê na komxebata yewîya netewî nêbenê.

PAK: Wazenê vernîya tifaqêkê rasteqînî yê netewî bigîrê

Serekê Pêroyî yê Partîya Azadîya Kurdistanî Mustefa Ozçelikî derheqê “Komxebata Yewîya Neteweyî” de qisê kerd û va: Ma teşebus û kombîyayîşo ke HDP û tikê partî û hereketî organize kerdî sey teşebusê tifaqê netewî nêvînenê.

Serekê PAKî Mustefa Ozçelikî Rûdawî rê qisê kerd û va: HDP û tike partî û firaksiyonê Bakurê Kurdistanî seba ke ma beşdarê kombîyayîşê înan bibê veynê PAK û PSKî zî, la ma pîya beyanatêk da û ma va, ma beşdarê kombîyayîşê şima nêbenê.

Ozçelikî îzeh kerd ke, Ma teşebus û kombîyayîşo ke HDP û tikê partî û hereketî organize kerdî sey teşebusê tifaqê netewî nêvînenê. HDP partiyêka netewî û Kurdistanî nîya. Wazenê vernîya tifaqêkê rasteqînî yê netewî bigîrê. Bakurê Kurdistanî mitabaqatê tifaqê netewî PAK,PSK,HAK-PAR, potansiyelê PDK yê Bakurê Kurdistanî û  potansîyela Kurdanê dîndaran esta.”

Serekê Pêroyî yê Partiya Sosyalîst a Kurdistanî (PSK) Mesut Tek zî va ke: “HDP ke rayverîya komxebate kena xo sey partiyêka Tirkiya vînena. Ê bi xo vanê, ma partiyêka Kurdistanî nîyê, ma partîyêka Tirkî ya

Endama Dîvana Serekîya Partîya Kurdistanî (PAKURD) Leyla Arisoy zî va: Ma “Komxebata Yewîya Neteweyî” ke Amed de bi beşdariya HDP û 7 partî û firaksiyonê Kurd amê pêser sey tifaqê neteweyî nêvînenê.

Hetkarê Serekê Hereketa Azadî Metîn Pîranî zî va: Kesêer ke verê xo danê Anqara, Şam û Tehra reyde yewitî ne mumkin a.”