Merkezê Xeberan - Peynîya hewteyî de cendirmeyan pare kerdbi ke vewre û pukî ra karê cigêrayîşî nêame destpêkerdene. 122 Servîsê Lezabezî, AFAD, UMKE û cendirmeyan serê sibayê dişemeyî ameyî erşaiwtene bi herême labelê vewre û pukî ra ê nêeşkîyayî xo biresnê herêma serebûtî.

Selahîyetdaranê herêmîyan da zanayene ke qezaya Ebexî de 13 multecîyan cemidîyayîşî ra merdî û rewşa hewayî eke baş biba ê do tîmê neweyî bierşawê.

Muxtarê dewe Şaban Ulgenî ard ziwan je sînor de heta nika karêk nêame kerdene.

Trajedîya multecîyan 9ê sibate de dewa Sariçîmenî ya qezaya Ebexî de amebî meydan. 13 multecîyê ke 10ê ci afgan û 3ê ci Kobanê ra yê yeno texmînkerdene ke cemidîyayîşî ra merdî. Heta nika multecîyî nêameyî dîyene. Walîtîya Wanî têna vat ke karê nê warî de dewam keno.

Muxtarê dewa Sariçîmenî Şaban Ulgenî îfade kerd ke mabênê dewe û sînorî de 10 kîlometreyî estê.

Ulgenî îdîa kerd ke heta nika nîşanêk çin o ke sînor de 13 kesî cemidîyayîşî ra merdî û vat: ''Na babete de ma do walîtîye reyde qisey bikerê. Tîmê walîtîyê qaşo roja dişemeyî biameyêne la şert û mercanê giranan ê zimistanî ra nêeşkîyayî bêrê. Kesêkî cenaza nêdîye.''

Goreyê doneyan Wan de serrêke de 37 multecîyî bi cemidîyayîşî merdî. Temmuza 2019î de zî wesayîtêkê bazirganîya merdiman o ke tede multecîyî estbî qelibîya û netîce de 17 multecîyî merdî û 50 kesî birîndar bîyî.

9ê sibate de zî tewr tay 30 multecîyî amebî dîyene ke tay mendbi ke cemidîyayîşî bimirê.

Serekê Şubeyê Wanî yê Komeleya Heqanê Merdiman (ÎHD) Murat Meletî îfade kerd ke serê sînorê Tirkîya û Îranî de hîrê serranê peyênan de bi seyan kesî cemidîyayîşî ra merdî û vat: ''Cenazayê nê multecîyan wexto ke vewre helîyena yenê dîyene.''