Mala êzdiyan li Cezîrê 13 jin û zarokên kurd ên êzdî yên ji destê DAIŞê hatine rizgarkirin, radestî Encûmena Şingalê kir.

Bi amadebûna nûnerên ji Mala êzdiyan û Rêveberiya Hesekê û Hêzên Sûriyeya Demokratîk (HSD), Mala êzdiyan 13 jin û zarokên êzdî yên ji destê DAIŞê hatine rizgarkirin, radestî Encûmena Şingalê kir.

Piştî rizgarkirina tevahiya navçeyên rojhilatê Firatê û bidawîhatina desthilata DAIŞê li Baxozê, HSDê karî bi dehan jin û zarokên êzdî yên ji aliyê DAIŞê ve hatibûn revandin, rizgar bikin.

Herwiha Piştî rizgarkirina wan, Mala êzdiyan li Rojavayê Kurdistanê serperiştiya veguhastin û vegera rizgarbûyan bo kesûkarên wan dike.

Di meha Nîsana bûrî de Nivîsîngeha Rizgarkirina Revandiyên kurdên êzidî ragihand, ji destpêka dagîrkirina Şingalê di 3ê Tebaxa sala 2014an ve 6 hezar û 417 kes hatibûn revandin. Heta niha 3 hezar û 476 kes hatine rizgarkirin û çarenivîsa 2941 kesan nediyar e.